تحدث المخرج خالد يوسف لأول مرة عن تفاصيل ما حدث بينه وبين المخرج الكبير يوسف شاهين قبل وفاته وطلبه أن يقام عزائه في جامع عمر مكرم.
وقال خلال لقائه ببرنامج “السؤال الصعب” على قناة سكاي نيوز العربية: ” أنا أول مرة هحكي المشهد ده صوت وصورة كنت قاعد مع الأستاذ يوسف وفجأة قالي ولا أنا لما أموت لازم تعملي العزا بتاعي في جامع عمر مكرم وتشغل الشيخ محمد رفعت الله يرحمه .. أنا اندهشت جدا وقولتله ليه يعني؟ قالي أنا عايز كده ده المشهد اللي أنا عايزه في جنازتي فطبعا لو كنت قولت الكلام ده بعد رحيله كان مين اللي هيصدق الكلام ده ممكن يقوله إني بدعي”.
وأضاف: “فأنا روحت تاني يوم على طول لولاد أخواته جابى وماريان خوري والأستاذ قاعد وقولتلهم الأستاذ قالي واحد اتنين فكان ردهم مذهل بالنسبالي معندناش مشكلة.. هما مسيحيين .. إنت إعمل العزا في الجامع وإحنا نعمل عزا في الكنيسة فكان ردهم بسيط جدا واتقفل الموضوع على كده”.
وأكمل حديثه عن تفاصيل وقت الوفاة وقال: ” فجت يوم الوفاة قعدت معاهم وقولنا هنعمل إيه في اللي هو قاله لأن دي تعتبر وصية فقالوا هنعمل زي ماهو قال وشايف .. فاتصلت عشان أحجز الجامع فقالولي ده راجل مسيحي إزاي هتعمله جنازة في الجامع ؟ لازم نرجع للجهات المعنية الأمنية وقالولي لازم تكلم فلان حد في وزارة الداخلية ..فقالي الكلام اللي إنت بتقوله ده هيعمل قلبان جامد وإحنا مش ناقصين ورفض الأمن إقامة العزا”.
وأضاف عن عودته لولاد إخوته لإيجاد مكان آخر لإقامة العزاء: “قولتلهم هو لو موجود دلوقتي هيقول أنا عايز جنازتي من ستوديو نحاس أول ستوديو وطأت قدمه فيه ويبقى سرادق عزاء مفيهوش تراتيل مسيحية ولا قرآن بس في مشاهد أفلامي ومزيكة أفلامى ونعيش لحظات بهجة مش لحظات عزا وبالفعل عملنا العزا بالشكل ده”.
وكان آخر اعمال المخرج خالد يوسف هو مسلسل “سره الباتع” الذي عرض ضمن السباق الدرامي لرمضان 2023.
المسلسل بطولة أحمد فهمي، أحمد صلاح السعدني، هالة فاخر، خالد الصاوي، حسين فهمي، ريم مصطفى، حنان مطاوع، أحمد صفوت، منة فضالي، عمرو عبد الجليل، أحمد وفيق، ميدو عادل، إسلام حافظ، مصطفى درويش، والمسلسل مأخوذ من رواية الكاتب الراحل يوسف إدريس.
المصدر: مقالة نت
