12:36 م
الجمعة 28 يوليو 2023
كتب مروان الطيب:
حل الفنان بيومي فؤاد ضيفاً على البرنامج الإذاعي “أسرار النجوم” تقديم المذيعة إنجي علي والذي يُذاع على راديو “نجوم إف إم” وتطرق خلاله للحديث عن علاقته بنجوم الوسط الفني ومشاريعه السينمائية والسبب وراء ابتعاده وقلة ظهوره إعلامياً.
وبسؤاله عن الصفات التي اكتسبها من والده ووالدته “الطيبة اسألي أي منتج في مصر عشان الناس تبقى عارفة أنا مباخدش 3 دقائق في الاتفاق فرفوش زي أمي، وبكره النكد جداً، بكره الزعل بعرف إزاي أبسط نفسي في أقل الإمكانيات، وممكن أروح مالديف مع ناس مبحبهمش ومش هنبسط وممكن أروح جمصة مع ناس بحبهم تبقى أحلى رحلة”.
أما عن والده فقال “خدت من أبويا العند، أبويا كان صعيدي الله يرحمه عنيد في الحق ولما أحس إن اللي قدامي مُصر على حاجة غلط وأنا عنيد جداً في الحدوتة دي وواخد من أبويا الصبر والاحتمال، أنا صبور جداً ودايماً مبيأسش ولا بكتئب وعندي أمل دايماً في بكرة أنه يبقى أحسن وبربي عيالي على كده، وبقولهم حاجتين عشان تبقي إنسان كويس الإخلاص والصبر، اخلص لما ربنا يرزقك بحاجة صغيرة أوي اعملها بجودة اعملها وكأنها حاجة كبيرة”.
كما علق بيومي فؤاد على قلة ظهوره إعلامياً والبرامج التليفزيونية ساخراً “إيه كلمة مقل لا تليق عليا”، كما أشار أن المخرج محمد ياسين يمازحه دائما قائلا “لما يكلمني في التليفون يقولي أكلم الفنان المقل بيومي فؤاد”.
يذكر أن الفنان بيومي فؤاد عُرض له في ٢٠٢٣ أكثر من فيلم، بينها بعد الشر، الصف الأخير، اتنين للإيجار.
